Du liebe Mensch,
i glaub du kennsch
das starke Verlange
öbis neu's azfange.

Doch gaht es dir wie vielne Lüt.
öbis andersch mache - nur nit hüt.
Vellicht de Morn, du weisch 's no nit,
uf jede Fall nimmsch du dir Ziit.

Denn denksch am End vom alte Jahr,
im neue Jahr mach i 's de Wahr.
Und so sich z' ändre wird verschobe
du denksch es isch no nit ufghobe.

Und irgend wenn denksch du s' isch z' spat
und weisch grad nüm wie 's wieter gaht.
Du laufsch im Trott mit vielne mit
und nimmsch für dich viel z'wenig Ziit.

Denn denksch mis Lebe isch doch schitter,
e so chumm i nit wirkli wieter.
Drum möchtisch vieles andersch ha
und alles fangt vo vorne a.

Doch liebe Mensch es liet a dir,
dr ander cha doch nüt derfir
wenn 's nit tuesch wage
und nur immer klage.

Es brucht halt scho es bizli Muet.
muesch immer si ganz uf dr Huet,
und vieli, vieli Sache
halt endli selber mache.

So wird dis Lebe zumene erlebe,
und du wirsch chönne zfriede werde.
Drum wünsch i dir viel muet und chraft,
dich selber z' befreie us dinere Haft.